ನಲ್ಮೆಯ ಗೆಳೆಯರೆ,


ಡಾ.ಆಜಾದ್‍ರವರ "ಜಲನಯನ" ಮತ್ತು ನನ್ನ "ಗುಬ್ಬಿ ಎಂಜಲು" ಪುಸ್ತಕಗಳ ಲೋಕಾರ್ಪಣೆ ಕಾರ್ಯಕ್ರಮಕ್ಕೆ  ನೀವೆಲ್ಲಾ ನಮ್ಮೊಟ್ಟಿಗಿದ್ದರೆ ಚೆನ್ನ.  ಇದೆ ನೆಪದಲ್ಲಿ ನಾವೆಲ್ಲಾ ಸೇರೋಣ. ಆನಂದಿಸೋಣ ಬನ್ನಿ.

  ನನ್ನ ಪುಸ್ತಕಕ್ಕೆ "ಗುಬ್ಬಿ ಎಂಜಲು" ಎನ್ನುವ ಹೆಸರು ಇಟ್ಟ ಕಾರಣವನ್ನು ಆನೇಕರು ಕೇಳಿದ್ದಾರೆ.   ಹೆಸರಿಗೊಂದು ಕತೆ ಇರಲೇಬೇಕಲ್ವ,  ಅದಕ್ಕಾಗಿ ನಾನು ಪುಸ್ತಕದಲ್ಲಿ ಬರೆದ ಲೇಖಕನ ಮಾತು ಕೂಡ ಒಂದು ಪುಟ್ಟ ಕತೆಯಾಗಿದೆ.  ಅದನ್ನು  ನಿಮ್ಮೊಂದಿಗೆ ಹಂಚಿಕೊಳ್ಳುತ್ತಿದ್ದೇನೆ.   

  ಶಿಶುವಿಹಾರ ಬಿಟ್ಟ ಕೂಡಲೇ ಓಡಿ ಬರುತ್ತಿದ್ದ ನನಗಾಗಿ ಕಾಯುತ್ತಿದ್ದಳು ನನ್ನ ತಂಗಿ. ಅವಳನ್ನು ನಾನು ಮನೆಯ ಹತ್ತಿರವಿರುವ ಅಂಗಡಿಗೆ ಕರೆದುಕೊಂಡು ಹೋಗಿ ಕಂಬಾರ್‍ಕಟ್ ಕೊಡಿಸಬೇಕೆಂದು ತನ್ನ ಪುಟ್ಟ ಅಂಗೈನಲ್ಲಿ ಐದು ಪೈಸೆಯಿಟ್ಟುಕೊಂಡು ಕಾಯುತ್ತಿರುತ್ತಿದ್ದಳು. ಪೈಸೆಗೊಂದರಂತೆ ಸಿಗುತ್ತಿದ್ದ ಅದು ನಮಗಿಬ್ಬರಿಗೂ ಇಷ್ಟವಾದ ತಿಂಡಿ. ಈಗಿನ ಒಂದು ರೂಪಾಯಿಯ ನಾಲ್ಕು ನಾಣ್ಯಗಳನ್ನು ಒಂದರ ಮೇಲೊಂದರಂತೆ ಜೋಡಿಸಿದಾಗ ಸಿಗುವ ಗಾತ್ರದಲ್ಲಿರುತ್ತಿತ್ತು.  ಬೆಲ್ಲದ ಪಾಕ, ಇನ್ನಿತರ ವಸ್ತುಗಳನ್ನು ಹಾಕಿ ತಯಾರಿಸುತ್ತಿದ್ದ ಅದಕ್ಕೆ ಒಂದು ಪುಟ್ಟ ಪ್ಲಾಸ್ಟಿಕ್ ಪೇಪರನ್ನು ಈಗಿನ ಚಾಕಲೇಟಿನಂತೆ ಸುತ್ತಿರುತ್ತಿದ್ದರು.  ಬಹುಶಃ ಆಗ ಚಾಕಲೇಟು ಇತ್ತೋ ಇಲ್ಲವೋ ಗೊತ್ತಿಲ್ಲ. ಅದ್ರೆ ಅದರ ಮೊದಲ ರೂಪ ಇದೇ ಇದ್ದಿರಬಹುದಾ ಅಂತ ನನಗೆ ಈಗ ಅನ್ನಿಸುತ್ತಿದೆ.  ಐದು ಪೈಸೆಗೆ ಐದು ಕಂಬಾರ್‍ಕಟನ್ನು ನನ್ನ ಕೈಲಿ ಕೊಡುತ್ತಿದ್ದಂತೆ ಒಂದನ್ನು ನನ್ನ ತಂಗಿಗೆ ಗೊತ್ತಾಗದ ಹಾಗೆ ಚಡ್ಡಿ ಜೇಬಿಗೆ ಹಾಕಿಕೊಂಡು ಉಳಿದ ನಾಲ್ಕನ್ನು ಅವಳ ಕೈಗೆ ಕೊಡುತ್ತಿದ್ದೆ. ಮೂರನ್ನು ತನ್ನ ಬಲಗೈನಲ್ಲಿ ಇಟ್ಟುಕೊಂಡು ಒಂದನ್ನು ನನಗಾಗಿ ಕೊಡುತ್ತಿದ್ದಳು.  ಅವಳನ್ನು ಅಂಗಡಿಗೆ ಕರೆದುಕೊಂಡು ಬಂದಿದ್ದಕ್ಕೆ ಬಕ್ಷೀಸಾಗಿ ಒಂದು ಕಂಬರ‍ಕಟ್ಟು ಸಿಕ್ಕಿತ್ತಲ್ಲ ಆಂತ ನಾನು ಖುಷಿಪಡುವಂತಿರಲಿಲ್ಲ. ಏಕೆಂದರೆ ಅವಳಿಗೆ ಅದರಲ್ಲಿ ಅರ್ಧ ನಾನು ಹಲ್ಲಿನಲ್ಲಿ ಕಚ್ಚಿ ತುಂಡು ಮಾಡಿ ಇನ್ನರ್ಧವನ್ನು ವಾಪಸ್ಸು ಅವಳಿಗೇ ಕೊಡಬೇಕಿತ್ತು. ಅಂಗಡಿಗೆ ಕರೆದುಕೊಂಡುಬಂದಿದ್ದಕ್ಕೆ ನನ್ನ ಬಕ್ಷೀಸು ಅರ್ಧ ಮಾತ್ರ. ಮತ್ತೆ ಪ್ಲಾಸ್ಟಿಕ್ ಕವರನ್ನು ಬಿಚ್ಚಿ ಹಾಗೆ ಹಲ್ಲಿನಲ್ಲಿ ನಾನು ಕಡಿಯುವಂತಿರಲಿಲ್ಲ. ಹಾಗೆ ನೇರವಾಗಿ  ಕಡಿದರೆ ಎಂಜಲಾಗುತ್ತದೆ ಅಂತ ಅದನ್ನು ಗುಬ್ಬಿ ಎಂಜಲು ಮಾಡಬೇಕಿತ್ತು.  ಗುಬ್ಬಿ ಎಂಜಿಲು ಎಂದರೆ ನಾನು ಹಾಕಿದ ಅಂಗಿಬಟ್ಟೆಯ ಒಳಗೆ ಅವಳು ಕೊಟ್ಟ ಕಂಬಾರ್‍ಕಟ್ಟನ್ನು ಅದೇ ಚಾಕಲೇಟುವಿನಂತೆ ಅಂಗಿಬಟ್ಟೆಯಲ್ಲಿ ಸುತ್ತಿ ನಂತರ ಹಲ್ಲಿನಲ್ಲಿ ಕಚ್ಚಿ ಎರಡು ತುಂಡುಗಳನ್ನು ಮಾಡಿ ಅದರಲ್ಲಿ ಒಂದನ್ನು ಅವಳು ಮತ್ತೆ ಎತ್ತಿ ಬಾಯಿಗೆ ಹಾಕಿಕೊಂಡ ಮೇಲೆ ನಾನು ಉಳಿದರ್ಧ ತುಂಡನ್ನು ತಿನ್ನಬೇಕಿತ್ತು.

 ಅಮೇಲೆ ಇದೇ ಕಂಬಾರ್‍ಕಟ್ಟು ಐದು ಪೈಸೆಗೆ ಒಂದು, ಹತ್ತು ಪೈಸೆಗೆ ಒಂದು ಅಂತ ಬೆಲೆ ಹೆಚ್ಚಾಗಿ ಅಮೇಲೆ ನಿದಾನವಾಗಿ ಮರೆಯಾಗಿಬಿಟ್ಟಿತ್ತು. ಬಹುಶಃ ಚಾಕಲೇಟ್ ಅದರ ಜಾಗವನ್ನು ಆಕ್ರಮಿಸಿಬಿಟ್ಟಿತ್ತೇನೋ. ಈಗ ಹಳ್ಳಿಗಳಲ್ಲೂ  ಸಿಗುತ್ತದೊ ಇಲ್ಲವೋ ಗೊತ್ತಿಲ್ಲ. ಅದರ ರುಚಿಯ ಸ್ವಾದದ ಸಂಭ್ರಮವೇ ಬೇರೆ. ಗುಬ್ಬಿ ಎಂಜಲು ಮಾಡಿ ಹಂಚಿಕೊಳ್ಳುವ ಆನಂದವೇ ಬೇರೆ.  ಸಿಕ್ಕುವ ತಿಂಡಿಯನ್ನು ಹಂಚಿಕೊಂಡು ತಿನ್ನಬೇಕೆನ್ನುವ ಆಸೆಯಿದ್ದರೂ ಹಲ್ಲಿನಲ್ಲಿ ಕಚ್ಚಿ ಎಂಜಲು ಮಾಡಬಾರದು, ಬೇಕಾದರೆ ಹೀಗೆ ಕಚ್ಚಿ ತುಂಡುಮಾಡಿ ಕೊಡಬಹುದು ಅಂತ ನನ್ನ ಅಜ್ಜಿ ತನ್ನ ಸೆರಗಿನೊಳಗಿಟ್ಟು ಮಾಡಿ ತೋರಿಸಿದಾಗ ಅದನ್ನೇ ನಾವಿಬ್ಬರೂ ಅನುಸರಿಸುತ್ತಿದ್ದವು.  ಇನ್ನು ನಾವು ಗೆಳೆಯರೆಲ್ಲಾ ಕೂಡಿ ತಿಂಡಿ ಹಂಚಿಕೊಳ್ಳುವಾಗ ಹೀಗೆ ಮಾಡಬೇಕಿತ್ತು. ಬಹುಶಃ ನನ್ನ ಗೆಳೆಯರ ಅಜ್ಜಿಯರು ಹೀಗೆ ಅವರಿಗೂ ಹೇಳಿಕೊಟ್ಟಿರಬೇಕೆಂದು ನನಗೆ ಅನಿಸುತ್ತದೆ. ಹಾಗಾದರೆ ನನ್ನ ಅಜ್ಜಿ ಮತ್ತು ಆಕೆಯ ಗೆಳತಿಯರು ಅವರ ಬಾಲ್ಯದಲ್ಲಿ ತಿಂಡಿಯನ್ನು ಹೀಗೆ ಗುಬ್ಬಿ ಎಂಜಲು ಮಾಡಿ ಹಂಚಿಕೊಂಡಿರಬಹುದಲ್ಲವೇ ಅಂತ ನನಗೆ ಅನ್ನಿಸಿದ್ದು ಸಹಜ.  

ಆಗ ಬಡವ ಶ್ರೀಮಂತ ಎನ್ನುವ ಭೇದ ಭಾವವಿರಲಿಲ್ಲ. ನಾವೆಲ್ಲಾ ಪುಟ್ಟ ಗೆಳೆಯರು ಒಟ್ಟಾಗಿ ಸೇರಿ ಆಡುತ್ತಿದ್ದೆವು. ಆಗ ನಮ್ಮ ಮನೆಗೆ ನನ್ನ ಗೆಳೆಯರು ಬಂದಾಗ ಎಲ್ಲರಿಗೂ ಅಮ್ಮ ತಿಂಡಿ ಕೊಡುತ್ತಿದ್ದಳು. ಹಾಗೆ ಅವರ ಮನೆಗೆ ಹೋದಾಗಲು ಅವರ ಅಮ್ಮಂದಿರಿಂದ ನಮಗೆಲ್ಲಾ ತಿಂಡಿ ತಿನಿಸುಗಳು ಸಿಗುತ್ತಿತ್ತು.  ಹೀಗಿನಂತೆ ಒಬ್ಬರ ಮನೆಯ ಮಕ್ಕಳು ಎದುರು ಮನೆಯ ಮಕ್ಕಳ ಜೊತೆ ಸೇರದಂತೆ ಬಾಗಿಲು ಹಾಕಿಕೊಳ್ಳುತ್ತಿರಲಿಲ್ಲ. ತೆರೆದ ಬಾಗಿಲುಗಳ ನಡುವೆ ನಾವೆಲ್ಲಾ ಓಡಾಡಿ ಆಡುತ್ತಿದ್ದೆವು. ನಮಗೆ ಸಿಗುವ ತಿಂಡಿಗಳನ್ನು ಹೀಗೆ ಹಂಚಿಕೊಂಡು ತಿನ್ನುತ್ತಿದ್ದೆವು. ಈ ಗುಬ್ಬಿ ಎಂಜಲು ಎನ್ನುವುದು ನಮಗೆಲ್ಲಾ ತಮಾಷೆ. ಆದರೆ ಅದಕ್ಕೆ ಅರ್ಥಪೂರ್ಣವಾದ ಭಾವವಿದೆ.  ಯಾವುದೇ ತಿನಿಸನ್ನು ಹಂಚಿಕೊಳ್ಳಬೇಕಾದರೂ ಹೀಗೆ ಗುಬ್ಬಿ ಎಂಜಲು ಮಾಡಿ ಕೊಡುವಾಗ ಅದರ ಸಿಹಿಯನ್ನು ಸವಿಯನ್ನು ಆ ಕ್ಷಣದ ಆನಂದವನ್ನು ಅನುಭವಿಸುತ್ತಾ ಹಂಚಿಕೊಳ್ಳಬೇಕೆನ್ನುವ ಮುಗ್ದ ಮನಸ್ಸಿತ್ತು. ಹಾಗೆ ಅದನ್ನು ಪಡೆದುಕೊಳ್ಳುವವನಿಗೂ ಇಷ್ಟಪಟ್ಟು ಸ್ವೀಕರಿಸಿ ತಿಂದು ಸಂಭ್ರಮಿಸುವ ಆಸೆಯಿತ್ತು.  

ಈ ಪುಸ್ತಕದಲ್ಲಿ ಇರುವ ಒಂದೊಂದು ಬರಹಗಳನ್ನು ಓದುವಾಗಲು ಮಗುವಿನಂತೆ ಮುಗ್ದವಾಗಿ ನಕ್ಕುಬಿಡಬಹುದು,  ಬುದ್ಧಿವಂತರಂತೆ  ಮುಗುಳ್ನಗು ಚಿಮ್ಮಿಸುತ್ತಾ ಮುಂದೆ ಸಾಗಬಹುದು, ಕೆಲವೊಮ್ಮೆ ಗಹಗಹಿಸಿ ನಕ್ಕು ಗೆಳೆಯರೊಂದಿಗೆ, ಹೆಂಡತಿಯೊಂದಿಗೆ, ಮಕ್ಕಳೊಂದಿಗೆ ಹಂಚಿಕೊಳ್ಳಬಹುದು, ಓದುತ್ತಾ ಕೆಲವೊಂದು ಲೇಖನಗಳಿಂದ ವಿಷಾಧ ಭಾವನೆಗಳು ತುಂಬಿ ಮೌನವಾಗಲೂ ಬಹುದು.  

  ಇದನ್ನು ಹೀಗೆ ಗುಬ್ಬಿ ಎಂಜಲು ಮಾಡುತ್ತಾ ಅದರ ಸವಿಯನ್ನು ಸವಿಯುತ್ತಾ ನಿಮ್ಮೊಂದಿಗೆ ಹಂಚಿಕೊಳ್ಳುತ್ತಿದ್ದೇನೆ. ನೀವು ಹಾಗೆ ಮುಗ್ದ ಭಾವನೆಯಿಂದ ನನ್ನ ಪುಸ್ತಕವನ್ನು ಸ್ವೀಕರಿಸುತ್ತೀರೆಂದು ಭಾವಿಸುತ್ತೇನೆ.

ವಿಶೇಷ ಸೂಚನೆ:  ನಮ್ಮ ಕಾರ್ಯಕ್ರಮದ ನಂತರ ನಾವು ಕೈಗೊಳ್ಳಬೇಕೆಂದುಕೊಂಡಿದ್ದ ಬ್ಲಾಗಿಗರ ಸಮಾವೇಶದ ಬಗ್ಗೆ ಹಿರಿಯ ಬ್ಲಾಗಿಗರ ಜೊತೆ ನಾವೆಲ್ಲ ಸೇರಿ ಒಂದು ವಿಚಾರ ಮಂಥನದ ಕಾರ್ಯಕ್ರಮದ ಯೋಚನೆಯನ್ನೂ ನಮ್ಮ ಹಿರಿಯ ಬ್ಲಾಗಿಗಳು ಹೊಂದಿದ್ದಾರೆ. ಇದನ್ನು ಗಮನದಲ್ಲಿಟ್ಟು ಹೆಚ್ಚು ಹೆಚ್ಚು ಬ್ಲಾಗಿಗರು ಕಾರ್ಯಕ್ರಮಕ್ಕೆ ಆಗಮಿಸಬೇಕಾಗಿ ಕೋರಿಕೆ.

ಪ್ರೀತಿಯಿಂದ

ಶಿವು.ಕೆ.